– Vi har høyrt reaksjonane

Fylket fjernar veglys: – Må få stoppa dette

Torsdag hadde Hovudutval for samferdsle og mobilitet (SAMU) i Vestland fylke møte. Der fekk dei opp ei sak om handtering av enkeltståande veglys. Som Grenda har omtalt ved fleire høve, har det blitt fjerna ein del slike veglys i Kvinnherad, ofte til stor misnøye for brukarar av den aktuelle vegstrekninga.

SAMU vedtok å be om at det vert lagt fram ei ny sak om handtering av enkeltståande veglys som er tekne bort eller vurdert tekne bort. Saka skal òg ha kostnadsoverslag for investering og drift for dei to alternativa: å oppgradera eller å demontera.

«Avvikling og demontering vert ikkje vidareført før saka er politisk handsama», vert det understreka i vedtaket. Det er også mogleg at allereie fjerna lys kan bli sett opp att.

Vidare står det at SAMU «har full forståing for at avvikling av enkeltståande veglys har skapt reaksjonar, og ber om at det i det vidare arbeidet vert lagt meir vekt på dialog med kommunane og andre involverte».

Falsk tryggleik

I ein artikkel på Vestland fylkeskommune si heimeside står det at heile 2.000 veglys vart vurdert fjerna. Argumenta var både drift og økonomi, og at desse lysa ikkje nødvendigvis gjorde tilhøva tryggare for trafikantane.

«Fagkunnskapen seier at både mjuke og harde trafikantar kan bli lurte av veglys som står utan andre lys i nærleiken, dei bidreg ikkje til jamn lyssetjing og kan gi falsk tryggleik. Slike lys kan skapa blending og store skilje mellom nokre få opplyste vegmeter og totalt mørke», står det.

Omfanget av fjerninga vart større enn det som låg til grunn då fylket vedtok sin veglysstrategi i 2022. «No er heile 5,4 % av dei rundt 37.000 veglysa langs fylkesvegane vurdert fjerna», vert det opplyst.

– Vi har høyrt reaksjonane frå innbyggjarar og trafikantar, og vi tek dei på alvor. Difor er arbeidet stoppa, og vi ber om ei grundig sak der alle sider ved fjerning av enkeltståande lys vert vurderte, før vidare vedtak, seier utvalsleiar Arve Helle (Ap) i artikkelen.

LED-armatur

Fylket skriv at det er fjerna enkelståande veglys både i Kvinnherad, Fusa og Ullensvang i 2026, og det er kome fleire klager.

Arbeidet med å oppgradera veglysanlegga vil halda fram. Talet veglys med LED-armatur har auka frå 15 prosent i 2022 til 48 prosent i dag. LED-lys reduserer straumforbruket med 75 prosent.