First Lego League
Ordføraren vil hjelpa Sunde skule med finansieringa
Det kostar over 200.000 kroner for Sunde skule å reisa til den skandinaviske finalen i First Lego League. No får dei ei handsrekning frå ordføraren.
Som Grenda skreiv på torsdag imponerte 7. klasse ved Sunde skule stort i finalen i First Lego League for deltakarane frå Sunnhordland og Bjørnafjorden. Det har også ordførar Vegard Bjørnevik (H) fått med seg.
– Vi har ei utruleg kjekk sak. Og det er at Sunde skule skal til den skandinaviske finalen i First Lego League, sa han til slutt i torsdagens formannskapsmøte.
Annonse
Finalen går av stabelen i Lund i Sverige allereie 27. til 29. november. Å senda både elevar, lærarar og nokre foreldre dit vil kosta over 200.000 kroner.
– Dei jobbar no med å få tak i midlar til å reisa, og har fått inn betydelege midlar frå næringslivet. Om det skulle stå på nokre kroner, så har ordføraren ein liten pott, slik at kommunen kan bidra på den måten, annonserte Vegard Bjørnevik.
Meistringskjensle
Den ideen fekk full støtte rundt bordet.
Annonse
– Eg synest det er veldig fint. Det er utruleg stas at Sunde skule har klart dette, dei er svært dyktige. Dette viser at satsinga på Newton-rommet skapar læring og meistringskjensle, kommenterte Silvia Tofte (H).
– Eg tek med meg signala, og så ynskjer vi Sunde skule lukke til i Lund, avslutta ordføraren.
