Sp si liste klar – Heen toppar

Aleksander Øren Heen kjem frå Årdal og bur i Sogndal. Han er utdanna byggmeister og driv eige byggfirma. Heen er i dag gruppeleiar for Senterpartiet i Vestland fylkesting og medlem av fylkesutvalet. Han har fleire periodar bak seg som fylkestingsrepresentant, både i Vestland og tidlegare Sogn og Fjordane. Han har òg vore møtande vararepresentant til Stortinget for Sogn og Fjordane og tidlegare statssekretær i Klima- og miljødepartementet.

– Eg er klar for å styra Vestland vidare. Vi har framleis mykje ugjort, og eit stort fylke som Vestland treng eit sterkt Senterparti i leiinga for å sikra utvikling og gode tenester i alle delar av fylket, seier Heen i ei pressemelding.

Samferdsle

Han peikar særleg på samferdsle, vidaregåande opplæring, samarbeid med kommunane og Vestland si rolle nasjonalt som viktige saker fram mot valet.

– Vi skal byggja vidare på det gode samarbeidet med kommunane, vera til stades i lokalsamfunna med vidaregåande skular og halda fram arbeidet med å byggja ut og betra fylkesvegnettet, seier Heen.

Senterpartiet har hatt fylkesordføraren i Vestland heilt sidan fylket vart oppretta, men Jon Askeland har sagt nei til attval. No blir det spennande å sjå om Heen kjem i posisjon til å overta.

Frå Kvinnherad

Topp 5 ser slik ut:

1. Aleksander Øren Heen, Sogndal

2. Sara Hamre Sekkingstad, Alver

3. Jakob Bjelland, Stord

4. Steffen Fjellestad, Gloppen

5. Tonje Ljones Såkvitne, Voss.

Kvinnherad er representert ved Andreas Ølvestveit frå Åkra på 22. plass og Julie Holmedal Askeland frå Utåker på 68. plass.