Statsforvaltaren droppar motsegn:
Planen for poll til poll-tunnelen mot sluttbehandling
Statsforvaltaren i Vestland trekker motsegna til reguleringsplanen for fylkesveg 49 mellom Nordre- og Austrepollen. Dermed ligg alt til rette for at veg- og tunnelplanen kan bli vedteken før jul.
Det var Hardanger Folkeblad (HF) som omtala denne saka først.
Saka gjeld ei avgrensa høyring av reguleringsplan for fylkesveg 49. Statsforvaltar hadde vesentlege merknader til det opphavelege planforslaget, nokre av dei av ein karakter som kunne gje grunnlag for motsegn.
– Statsforvaltaren har såleis ingen vidare grunnlag motsegn til planframlegget med bakgrunn i jordvernet, heiter det i den endelege uttalen til Kvinnherad kommune, skriv HF.
Og sjølv om det er gjort store endringar for å verne naturmangfald og dempe støyplager, åtvarar Statsforvaltaren framleis om at fleire bustader hamnar i gul støysone, og krev strengare kontroll med massedeponi og matjorda i området. Og ber om at kommunen i det vidare arbeidet i størst mogleg grad følger opp Statsforvaltaren sine merknader og tilrådingar i saka.
No skal detaljreguleringsplanen for poll til poll-tunnelen snart opp til andre gongs behandling i kommunestyret.
– Me legg opp til ekstra møte i Plan-, teknikk- og miljøutvalet 1. desember, og med positivt vedtak der blir det sluttbehandling i kommunestyremøtet 17. desember, opplys ordførar Vegard Bjørnevik (H), til Hardanger Folkeblad.