Meldar fekk sjølv kontroll på terrengbrann

Onsdag morgon like før klokka 09.30 melde 110 Vest at dei rykte ut til brann i terreng ved Strondavegen på Halsnøy. 

I første melding blei det opplyst at det var 50 meter til næraste hus.

– Meldar skulle brenna noko avfall, men det tok fyr i terrenget og spreidde seg, ifølgje operasjonsleiar Tore-André Brakstad.

Kort tid etter, klokka 09.32, melder Børre Brekkvassmo i brannvesenet at brannen er sløkt. Det var meldar sjølv som fekk kontroll på situasjonen. 

– Brannvesenet køyrer fram for kontroll. 

Onsdag ettermiddag seier politistasjonssjef Sigurd Børve at branntilløpet starta som eit lite og tilsynelatande uskuldig bål på eit tun.

– Det er veldig tørt no, og dette var i tilknyting til skog, lyng og gras. Med litt meir vind kunne ein fort ha mista kontrollen, seier Børve.

Han rosar meldar for å ha sett i gang sløkking og varsla naudetatane.

– Når det først skjedde, vart situasjonen godt handtert av dei som var på staden, bortsett frå at det ikkje burde vore tent fyr i det heile tatt, seier Børve.