Kommunestyret
Utsette reiselivsplanen etter lang debatt
SV sikra seg eit knapt fleirtal for å utsetja reiselivsplanen og cruisestrategien til nye tal ligg på bordet.
Det var Hildegunn Hanstvedt Tofte som la fram utsetjingsforslaget. Ho viste til at saksgrunnlaget nytta seg av tal frå 2022, og minna om at Innovasjon Norge kjem med ferske tal om cruisetrafikken allereie 11. november.
– Ein må dokumentera kvar tolegrensa går. Det er viktig å ikkje forhasta seg når kunnskapsgrunnlaget er rett rundt hjørna, sa ho.
Annonse
Ove Lemicka var ikkje samd, og antyda at nye tal ikkje vil endra kva partia meiner om saka.
– Vi kan ikkje driva og utsetja og utsetja. Eg vågar å påstå at eg veit kva SV meiner etter den cruiseanalysen i november, meldte han.
– Kva SV meiner om cruisetrafikk er eigentleg irrelevant for denne saka, kontra Hildegunn Hanstvedt Tofte.
Intensjonen
Annonse
Per Harald Havnen Löfgren Johansen (Ap) vedgjekk at intensjonen til SV var god, men var elles samd med Lemicka i at ein allereie veit kvar partia står i saka. Han fryktar at med ei utsetjing for å oppdatera tala så vil det fort gå eit halvt år før saka kjem attende. Jostein Saghaug (MDG) var derimot på lag med SV.
– Dette er nok den saka som kostar oss minst å senda tilbake. Eg kan ikkje sjå at dette hastar veldig, vurderte han.
Med 19 mot 15 røyster vart det bestemt å utsetja.
