Fekk svar om kaien i Åkra

I spørsmålsrunden bad Stein Olav Ølvestveit om status for etablering av kommunal kai i Åkra.

– Kommunestyret har tidlegare fått opplyst frå administrasjonen at etableringa av ein kommunal kai i Åkra skulle sjåast i samanheng med den nye brannstrukturen og bygging av nye brannstasjonar i kommunen, innleia han.

Ølvestveit minna så om at Kommunestyret i september vedtok at stasjonane i Åkra, Fjelberg og Varaldsøy skal etablerast som rein-sone-stasjonar, i hovudsak nær kai der dette er mogleg.

For Åkra vil ein likevel nytta eksisterande tomt.

Kritisk tiltak

– Sidan vedtaket slår fast at ein for Åkra sin del vil nytta den eksisterande tomta – og ikkje flytta stasjonen til ei ny kaiplassering – oppstår det uvisse kring korleis kaisaka blir handtert vidare, sa Stein Olav Ølvestveit.

Han la til:

– Ein kommunal kai i Åkra er eit etterlengta og kritisk infrastrukturtiltak, heilt uavhengig av brannstasjonen si plassering. Ein funksjonell kai er avgjerande for det lokale næringslivet, landbruket, og for transport av massar og tungt utstyr i bygda. I tillegg er ein god kai i Åkra ein nøkkelfaktor for den generelle beredskapen i området, særleg ved akutte hendingar til sjøs eller behov for sjøtransport i samhandling med naudetatane. Det er difor viktig at kaisaka ikkje stopper opp sjølv om brannstasjonen blir verande på dagens tomt.

Alternative løysingar

På denne bakgrunn stilte han følgjande spørsmål til ordføraren:

1. Kva skjer med planane og det vidare arbeidet for ein kommunal kai i Åkra no som brannstasjonen er vedteken lagt til eksisterande tomt?

2. Korleis jobbar kommunen vidare med kaisaka for å sikra nærings- og beredskapsbehovet i Åkra, og kva framdriftsplan ligg føre for dette prosjektet framover?

Kommunedirektør Leif Ove Mikkelsen tok på seg å svara.

– Ein jobbar veldig godt med ulike alternative løysingar for å ta ned kostnadane, sa han.

Mikkelsen varsla politisk sak med kostnadsoverslag til Kommunestyret i november eller desember, men føretrekk om saka kjem innom eit utval fyrst.

– Parallelt pågår det òg eit budsjettarbeid, understreka han.