Framleis kundar utan straum

Varaldsøy, Ølve, Hatlestrand, Årsnes og inn til Austrepollen, i tillegg til Gjetingsdalen og Utåker var av dei som var lengst utan straum etter Amy hadde herja ifrå seg natt til laurdag.

Terje T. Enes bur like ved campingen på Ænes, og var oppgitt over situasjonen. Han fortalde at straumen kom og gjekk fleire gonger fredag, men at den hadde vore vekke heile laurdagen. 

– Eg har prøvd å koma i kontakt med BKK, men blir berre ståande i kø. Ingenting skjer og vi får ikkje svar. Heile Ænes er mørkelagt, sa han til Grenda. 

Klokka 17.30 laurdag var det 4.400 kundar utan straum i Vestland, og over 1.300 av desse frå Kvinnherad. Klokka 19.30 laurdag var talet nede til 860 kundar.

Jobbar på spreng

Søndag klokka 14.40 var det framleis 191 berørte kundar i Kvinnherad ifølge straumkartet til BKK. Dette talet er måndag morgon redusert til 25, og området det gjeld er Ulvanes i Ølve.

På nettsidene sine skreiv BKK søndag at dei hadde mobilisert alt av tilgjengeleg personell.

«Vi jobbar så raskt vi kan med å sikra at alle fastbuande kundar får straum igjen så raskt som mogleg» melde dei.

Vidare at det framleis var uklart når ein kunne forventa at straumen kom tilbake, men at skadane på nettet kunne medføra at straumen ikkje vil vera tilbake før søndag ettermiddag, og for nokre kan det ta endå lengre tid.

Kristina Kollerud Austrheim, kommunikasjonsjef i BKK, fortalde til Grenda laurdag at dei jobba på spreng. Ho håpa at BKK hadde fått retta feila innan seint laurdag kveld, men la til at det var krevjande arbeid som kunne koma til å ta lengre tid.

– Vi jobbar så lenge vi kan og så lenge det er forsvarleg for dei tilsette. Så er det slik at vi naturleg nok har slite ein del med framkoma, men vi gjer det vi kan for å retta ting så snart som mogleg, sa kommunikasjonssjefen.

– Akkurat kva tid straumen er tilbake, tør eg ikkje lova. I beste fall blir det seint laurdag kveld, men det kan dessverre ta lengre tid også. Vi forstår godt at folk er fortvila, men dei skal vita at vi gjer alt vi kan for å løysa opp i dette, sa Austrheim.

Tusen i telefonkø

Gjennom helga har kundesenteret til BKK naturleg nok hatt stor pågang, og mange kundar har blitt ståande lenge i telefonkø.

– Dette er til tross for at vi har oppbemanna og rigga oss for denne stormen. Dette må vi sjølvsagt berre beklaga, men vi har hatt fleire tusen kundar i kø i periodar, kunne Austrheim fortelja.

Ho la til at dei også jobba med å kommunisera informasjon ut til kundane, både via SMS (for dei som er råka av såkalla høgspennsfeil), og med å jobba proaktivt ut mot media. I tillegg til jamnlege oppdateringar på nettsida og i straumkartet sitt. 

– Dette har vore litt ekstremsport, men straum er kjempeviktig for folk, og vi gir oss ikkje, og skal jobba på, trøysta ho.

Fokus på heile konsesjonsområdet

På spørsmål om korleis det blei jobba i felten, og kva område BKK prioriterte, var Austrheim klar.

– Vi har rigga oss for å handtera feil i heile konsesjonsområdet vårt, og har sørga for å ha auka bemanning i alle områda for at ein ikkje skal slita med at til dømes bruer kan bli stengt, sa ho, og la tryggande til for alle Kvinnherad-kundane: 

– Det er ikkje sånn at blikket vårt berre er på Bergen. Vi ser på Sunnfjord i nord til Etne i sør, og mobiliserer over heile området, og sender ressursar rundt til der feilen er.