Køyrde bak mopedist:
– Bruker vegen til å leike seg på
Mildvêret og sola har gjort inntog, og dermed har politiet fått det travelt med å halda våryre førarar i taumane - spesielt i helga.
Sigurd Børve, ein for tida litt oppgitt politistasjonssjef, fortel at dei har observert fleire problematiske situasjonar i trafikkbildet i kommunen den seinare tida.
I tillegg får dei stadig inn meldingar frå irriterte naboar som mistar kvelds-og natteroen på grunn av støy frå køyretøy som brukar private parkeringsplassar og industriområde som deira personlege leikeplass.
– Det er mykje spinning og børning om dagane. Vi har vore rundt og kontrollert fleire køyretøy og prata med førarar. Vi skriv desse ned, og dersom dei blir tatt igjen vil det bli reaksjonar, lovar Børve.
Områda dei ofte observerer denne typen aktivitet i, er på Husnes industriområde, på parkeringsplassen ved Kvinnherad Arena, samt i Høylandsbygd.
– Dei brukar vegen til å leika seg på, og det er ikkje greitt.
Mista lappen
Patruljen blei også vitne til ei hending i helga, som enda med førarkortbeslag.
– Patruljen køyrde bak ein mopedist, ein mann i 20-åra, som over tid utviste ei slik køyreåtferd, sjølv med blålys bak seg, at vi meinte det var rett at han fekk ein reaksjon, og vi valte derfor å inndra førarkortet til vedkomande.
Hendinga skjedde i eit bustadfelt på Husnes.
– Vi må nok intensivera kontrollane våre framover både på kveldstid og i helger, vurderer han avslutningsvis.
