Mann døydde av brannskadar

Påskeaftan rykte alle naudetatar ut til ei privat adresse på Halsnøy etter melding om ein person som var påført alvorlege brannskadar i samband med matlaging. 

– Skadane framstod så alvorlege då vi kom fram at luftambulanse blei kalla til staden, fortel politistasjonssjef Sigurd Børve. 

Mannen klarte å kommunisera med naudetatane på dette tidspunktet, og pårørande kom til staden. 

Men livet stod ikkje til å redda, og mannen døydde på Haukeland sjukehus seinare same kveld, opplyser Børve.

Den omkomne er ein mann i 60 åra, og politiet vel å gå ut med informasjon ettersom det var mykje uttrykningskøyretøy på staden. Politiet går ikkje ut med namn på vedkomande per no.

Børve fortel at helsepersonell på staden tok seg av dei pårørande, og at dei no vil bli følgf opp vidare av kommunen.