Skal velja nytt Ungdomsråd – ynskjer kandidatar
I tida framover skal det veljast nytt Ungdomsråd. Alle organisasjonar som jobbar for og med ungdom i Kvinnherad, til dømes ungdomsbase, idrettslag, elevråd, osv., har lov til å senda inn forslag på kandidatar.
Kandidatane må vera mellom 13 og 19 år gamle, og enten gå på ungdomsskule/vidaregåande skule i kommunen, eller vera med i ein organisasjon. Fristen for å senda inn forslag er 15. oktober.
– Ungdomsrådet er eit politisk medverknadsorgan som skal fremja meiningane til ungdom i kommunen. Vi er partipolitisk uavhengig, og skal ikkje driva partipolitikk på våre møte/arrangement. Ungdomsrådet har møte- og talerett i alle kommunestyremøte, og er eit viktig møte mellom ungdom og lokalpolitikarane. Tidlegare har ungdomsrådet arbeidd med prosjekt som «hent meg-bussen», helsesjukepleiarar på skulane, og mykje meir, samt arrangert ungdomspolitisk dag for alle ungdomsskulane og vidaregåande i kommunen», opplyser Frøya Sverresdotter Hatteberg, noverande leiar av ungdomsrådet, til Grenda.
