Stormen herjar:
Stengte vegar og straumbrot

Laurdag morgon klokka 07.00 fortel vakthavande i Kvinnherad brann og redning, Are Blokhus, til Grenda at det er fleire stengte vegar i kommunen. Mellom anna er det eit tre som sperrar vegen ved KVV, samt eit tre i vegbanen på Kaldestad. 

Også mellom Utåker og Sandvoll ligg det ein del tre i vegbanen. Eit stort tre har velta over vegen ved Erslansvatnet.

Åkra Bygdelag melder på si Facebook-side at det har kome mange tre i vegen, spesielt ved Brekkesvingane. Dermed er bygda isolert.

Vegen er også stengt i begge retningar nord for Stanganeset i Austrapollen, etter at det gjekk eit steinras der rundt klokka 03.15. 

Klokka 00.34 gjekk det eit mindre steinsprang ved Tveitnesvika langs Sunndalsvegen. Ifølgje Vegtrafikksentralen er det eit smalt køyrefelt forbi.

Fredag

Ved Røyrane mellom Ølve og Hatlestrand hadde eit tre blåse over vegen og sperra for trafikk seint fredag kveld. Bjørn Henning Nepstad frå Ølve delte bildet på Facebook rundt klokka 23.30. Klokka 00.30 fortalde Nepstad til Grenda at brannvesen skulle vera på veg. 

I kommentarfeltet var det samstundes fleire som melde om tre i vegbanen andre stader.

«Vegen er òg sperra av eit tre som har falt ned over ei straumlinje i Vestervik, altså før Langetunnelen når ein kjem frå Hatlestrand» skreiv ei. Ein annan skreiv at det også var eit tre i vegbanen ved Kviteberg/Tveitane. 

Vegtrafikksentralen melde også fredag klokka 21.36 at Fv. 500 var stengt i begge retningar ved Neslia i Rosendal, nærare bestemt ved Beinavika. Årsaka var eit tre som hadde velta over vegen. Vegen er no opna igjen.

BKK har også meldt om fleire straumbrot i kommunen fredag kveld. I Rosendal, på Utåker, Husnes, Halsnøy, Varaldsøy og Hatlestrand, men også andre stader har blitt råka i periodar. 

I tillegg er ferjeavgangar innstilt som følgjer av stormen «Amy».

Har du tips frå der du er? Kontakt oss på post@grenda.no, eller på telefon 53 48 71 00.