Nominert på fylkestinglista
– Tek med perspektiva frå lokalsamfunna
Silje Nordtveit Olsen frå Husnes er nominert til fylkestingslista for Vestland SV.
Vestland SV heldt laurdag nominasjonsmøte på Vestlandshuset i Bergen. Der valde dei Silje Nordtveit Olsen (43 år) på femteplass på lista til fylkestingvalet neste haust. Silje arbeider på Nav, er nestleiar i Kvinnherad SV, gruppeleiar for Kvinnherad SV i Kommunestyret, sit i Formannskapet og eigarskapsutvalet. Silje er også 2. vara til Stortinget for Hordaland, og har elles brei politisk erfaring.
– Eg er stolt over å vera Vestland SV sin 5. kandidat. No har kvinnheringar ei moglegheit til å få ein engasjert kvinnhering på fylkestinget, seier ho i ei pressemelding.
Annonse
Fyrsteplassen gjekk til Alexander Papas (25) frå Stord, Marianne Sæhle, noverande gruppeleiar, tok andreplassen, Hege Lothe frå Gloppen tredjeplassen og Steinar Øydvin frå Sogndal kom på fjerdeplass.
Dei store linjene
– Eg ynskjer å vera ei stemme som tek med seg perspektiva frå lokalsamfunna inn i fylkespolitikken. Eg er jo ein del av eit lag som både ser dei store linjene og forstår kva avgjerdene betyr for folk i kvardagen, seier Olsen.
Også fylkesleiar Jarle Brattespe er nøgd med møtet og lista.
Annonse
– Nominasjonsnemnda har fått mengdevis med innspel til lista og kunne fylt fleire lister med gode kandidatar. Som fylkesleiar tykkjer eg det er stas at vi har så mange dyktige folk som ynskjer å stille opp for partiet, og eg er glad for at vi har to flotte kandidatar som ynskte å stå på toppen av lista, kommenterer han.
